١٠
تأكد من كل اشي بتكتبو قبل متبعتو ، وتأكد لمين رح تبعتو!
المهم هبه من كثر مهو حظها عاطل ، وبختها مايل ، جوزها عصام عندو ٤ خوات ، عباره عن اقوى واخبث ٤ خوات بالعالم ، في منهم وحدة مصنفة دولية عالمية بالتنكيس والتقليل من قيمة اي انجاز ، يعني لو توخد جائزة اوسكار بالفلك ، رح تقولك عفكره اخدت زيها وانا بالخامس!
وفي وحده منهم من انكد بنات الارض ، يعني عادي يوم عرسها تنكد عل ٤٠٠ المعازيم مع ضيافتهم مع كيكاتهم مع اكلاتهم مع خواتهم!
وفي اخت ساهيه لاهيه داهيه خبيثه حية من تحت لتحت!
اما احسن وحده فيهم احسن وحده ، معها ماجستير مجاكره من جامعة الكرنبة الدولية ، يعني عادي انها تجاكرك بإنها انصح منك عادي ، وبتزبط معها!
المهم هدول الاربعه الخارقين اللي فوق ، مجتمعين بجروب واتساب مع هبه مرت اخوهم الوحيد الغالي المدلل عصام!!
هبه اصلا ما بتحب الجروب ، وما بدها اياه ، بس شو جابرك عالمر؟! عصام!!
هبه بهالجروب بتحاول تضل بالسليم ، يعني بترد عالسؤال بجواب مختصر ، وعالصوره ب منوره ، وعالطبخة ب بتشهي ، وعالتسريحة ب بتعقد !
وعلى رأي المثل ، ماشية الجروب الجروب ، وبتقول يارب الستر!!
في يوم من الايام ، الحياه سعيده والشمس تشرق والعصافير تزقزق!
خوات عصام كاينين طالعين ع حفلة عيد ميلاد ، مزبطين حالهم ولابسين اللي عالحبل ، وميك اب وسشاوير و اواعي ، وراحو ع عيد الميلاد وانبسطو ، وهمه ع قناعة انهم كانو احلى بنات بعيد الميلاد ، مع العلم انو كل عيد الميلاد فش فيه الا ٦ بنات ، بس خلص هيك همه بدهم ، ليكون حدا مش عاجبو؟!
المهم متصورين صورة الاربعة مع بعض بعيد الميلاد ، عليم الله طالعين زي فزاعات الحديقة الغير مثمرة المتهالكة الاغصان!!
بعتو الصوره على الجروب ، وبستنو تعليق هبه عالصورة ، طبعا هبه شافت الصورة نقزت ، واستغفرت ربنا ٤ مرات ، وقالت بعقلها إن شاء الله اذا الله رزقني بنت تطلع بتشبه عماتها ، بلاش اروح اتبرع فيها لاقرب مركز امني 😂
المهم هبه كتبتلهم ماااااشاااااااء الله عليكم ، يخزي العين عليكم شو حلوين ومرتبين ، شو هاللبس شو هالاناقة انا متأكدة انكم سرقتو اضواء الحفله كلها ، يا الله شو لبسكم حلو ، شو مكياجكم خفيف وناعم ، الله يحميكم حبيباتي ، ادعولي تيجيني بنت تطلع بتشبهكم كلكم 😍
وهي تقول بعقلها إن شاء الله ما يدعو ، بس كلهم كتبو يارب امين 😂
المهم بنفس اللحظه ، هبه عندها جروب مع خواتها وبنات عيلتها ، ودايما بتشكيلهم عن خباثة بنات حماها ، وبتعلق عليهم !!
هبه حفظت صورة بنات حماها ع موبايلها ، ودخلت ع تعديل الصور ، وكتبت عالصورة : شوفولي هالاربع كائنات ، عليم الله لو يطلعولي بالليل ، لابطل اخلف ، اموت واعرف عند اي كهربجي عاملين مكياجهم 😂
لا وشوفو اللبس ، تقولو بحفله تنكرية ، لا وقلتلهم إن شاء الله بنتي تطلع زيكم ، عليم الله بقتلها 😂
صبايا اوعو تبعتو الصوره لحدا بلاش اتطلق 😂
المهم هبه مسكت الصورة ، وبعتتها بالغلط ، ع جروب خوات جوزها !! ولا بزبط تسحبها ، ولا تشطبها ، ولا تبلعها ، ولا تكسر الموبايل ، ولا تنتحر ، ولا تدخل بغيبوبه !
من العجقة بطلت تعرف شو تعمل ، مره تروح تضب اواعيها ، مره تغسل وجهها ، مره تقرأ المعوذات ، مرة تركض ع جهاز المشي ، مره تتنفس بسرعه !!
مره ترن ع امها تقولها انا اتطلقت اتطلقت اتطلقت وتسكر الخط!
مره ترن ع جوزها تقولو بحبك وتسكر الخط!
المهم بعد ساعه ، حسب شاهد عيان من الجيران ، قالو انهم شافو ٤ بنات طلعو عالعماره ركاض ، وبعد شوي نزلت وحده غيرهم ركاض وبتصرخ وبس بتقول حسبي الله ونعم الوكيل فيكم 😂
وكاينه وهي بتركض بالشارع مش لاقيه تكسي ، متعربشه على بيك اب بالشارع ورايحة!
#يا_عمي_بالغلط
#عمر_زوربا
.......................................
في واحد من هون ، صارلو فترة بحكي مع وحدة اجنبية ، من اميركا ، المهم البنت لا بتحكي ولا بتكتب عربي ، بتعرفش ولا كلمة ، ولا حرف!
طبعا هو انجليزياتو مناح ، اقنعها انها الحب الوحيد ، والقلب سعيد ، وانا لك وانتي الي ، وما بقدر اعيش without you يا غالية !!
المهم يا جماعة ، هو اصلا بحب وحدة هون برضو ، قلبو شوي واسع ، بس قال بعقلو ، بسرح بالاجنبية ، بلكي سلختني جنسية ، والحياة صارت مية مية!
المهم ، الامريكية بتشوفو عالفيسبوك نازل سلخ لايكات وكومنتات عند حبيبتو اللي هون ، وسألتو مين هاي اكتر من مره ، مين هاي يا ماي heart ، قلها هاي اختي!!
وهالحزينة الامريكية زي الطرشا بالزفة!
راحت ال days واجت الايام ، شافتو بيوم كاتب بوست طويل عريض يوم عيد ميلاد حبيبتو ، اللي هو حاكيلها انها اختو !
الشب كاتب كل عام وانتي حبيبتي يا غالية ، يا قلب الروح ، وحبي لغيرك مش مسموح ، مهما الايام تيجي وتروح ، غير عطرك بحياتي ما رح يفوح ، وين مآجي ووين م اروح ، بحبك انتي يا ام ممدوح ، بحبك بحبك وبستنى تلبسيلي الابيض ، ونعيش ببيت واحد ، ويجينا ممدوح الصغير 😍 ، هديتك بس اشوفك!
الامريكية لعب الفار بعبها ، وقالت يا عمي معقول كل هالبوست لأختو؟! اخدت البوست copy وترجمتو عالجوجل ، بس ما تترجم معها منيح ، شو اللي تلبسيلي ال white ، و مااامدددوه ، ومن هالحكي!!
بعتتلو حبيبي who's ممدوح ؟!
قلها ابوي ! My dad يا غالية!
قالت بعقلها اه يمكن كاتب بوست لعيد ميلاد اختو و حاشر ابوهم بالنص ، حرام ظلمتو ل حبيبي!
ظل الفار يلعب بلياردو بعبها ، وظلت تحوص وتلوص ، هالكرنيبة شكلو فيها عرق عربي ، ضلت تحوم الساهية اللاهية لما تعرفت ع بنت بالاردن عن طريق صاحب صاحبيت بنت خالة بنت عم جار استاذها تبع زمان !
قالتلها for you ولا للذيب؟!
هديك قالتلها الذيب faster ،
المهم قالتلها بدي تترجميلي هالحكي بعرضك ، وبعتتلها البوست و قالتلها يلا روحي طالعة ، translate يا غالية !!
رجعتلها بعد شوي قالتلها ولك مالك هاد واحد كاتب بوست لحبيبتو بعيد ميلادها !
حبيبتو!!!!؟؟؟؟ مش اختو يعني 😳
قالتلها اخت مين ولك؟! عيب عليكي!! ولك بستنى يتجوزو ويخلفو ولد اسمو ممدوح!!!
الامريكية قالتلها are you sure ؟! لانو القصة فيها حياة و banana ؟؟؟!
قالتلها اه متاكده و لك !!
المهم برضو ، الامريكية اتفقت مع البنت المترجمة ، تتواصل مع ام ممدوح ، مشان تحط النقط عالحروف ، وتفرجيها انو حبيبها الاسباني كذاب وبسرح ببنتين من دولتين مختلفتين ،
المهم ،،،
#بعدين_بنكمل
#اسبانيا #اقليمي #واي_بيبي_وااي
#عمر_زوربا
........................
هي اول تأخير ساعة مع خطيبي الغالي ❤️
حبيبي ، مهما يأخرو الساعة ، مارح اتأخر عن حبك ثانية وحدة ، الله يخليلي ياك ، ونعيش سوى ، ونجيب حمزة ، واصير اوقفلك عالبرندة الصبح وانتا طالع عالشغل ، واحمل حمزة ، واناديك ، حبييييبي ، وانتا ترفع راسك وتتفرج عليي ، واطيرلك بوسة مني ، وبوسة من حمزة ، وانتا ترنلي ، وتحكيلي حبيبتي بتعرفي اني اشتقتلك؟ مع اني هلا هلا نزلت من البيت!
وبس يصير موعد ترويحتك ، اكون ناقعة الرز ، وحاطة البامية عالنار ، من اللي بحبها قلبك ، ونوكل انا وانتا وحمزة ، وما نهتم بالساعة ، اخروها ، قدموها ، لعنو ابوها ، المهم انتا جنبي ، وحمزة جنبي ❤️
وبعد مرور ٤ سنوات!
هيها ام حمزة عند دار اهلها ، لانها كانت محبوسة اسبوع بحماية الاسرة بتهمة ( إيذاء بليغ ) لانها لقطت ابو حمزة مع وحدة بالسيارة عدوار الداخلية ، ومشغل اغنية ( خف حبك خف تفرق بين غمرة وكف ) ومبسوطين والامور تمام!
شافت هالشوفة انجنت ، رنتلو ما رد ، رنتلو برضو ما رد ، بعتلها مسج انا باجتماع مع المدير ، برجعلك!
تركتو ، وروحت ، وبس رجع عالبيت ، ما حكت ولا كلمة ، بس نام ، اخدت موبايلو ، فتحت الباسوورد ، تاريخ ميلادو بالعكس ، دخلت عالواتساب ، لقت اسم ( ابو مجدي حب ) ، فكرتو ببيع حبوب وهيك ، شكّت بالموضوع ، دخلت عالمحادثة ، لقت ابو مجدي باعتلو : اليوم كان مشوار روعة ، اول مرة بحسك بتحبني جد ، بحبك بحبك ، والله يريحك من هالغوله اللي عندك!
قصدها عن ام حمزة بالغولة ، المهم هي قرأت المسج من هون ، وحلفو يمين الجيران انهم شافو ابو حمزة بركض وهو نايم ، وماسك ب ايدو بابوج فردة وحدة ، وبصرخ وبردد كلمات غريبة ، بس كان في دم على عينو ، وبركض شوي وبتفرج وراه وبوقع وبرجع بركض ، ملموس الزلمة ملموس!
وهيها ام حمزة هسا بتسب عالساعة اللي عرفتو فيها ، وعالساعة اللي اخروها وهو خاطبها ، وعالرز اللي نقعتو ايام زمان!
#مابين_الشسمو_والشسمو
#عمر_زوربا
Bạn đang đọc truyện trên: AzTruyen.Top