- اجا الخريف , و انحطيت بموقف سخيف ! 🍁
بليلة حالكة ما فيها ضو لمبة حتى ! كنت مروحة من دوامي ,
ماشية بكل استسلام لقدري الحزين الوحيد , قاعدة بزحف خطوة ورا خطوة و بفكر إمي شو رح تكون طابخة لإنو معدتي قاعدة بتلطم , تعدت مرحلة الزقزقة خلص ! 💥
أسفل ظهري كان صايبه انزلاق غضروفي من قعدة المكتب بالشغل ,
و بدني مقشعر من نسائم الهوا لإنو إمي تاركة تنزيل اللبس الشتوي تا تنهال علينا السحب الثلجية , و فش حدا يشلح جاكيته و يحطه ع كتافي الهزيلات ! ولا حدا يُمسك كفوفَ يداي و ينفخ عليهم الهواء الدافئ ! 🌀
أنا عادي متقبل كل هاي التفاصيل لإنو خلص الواحد تمسح , صار آلة , مش سائل عن اشي , قلبي مش انطفى ! قلبي عمل log out كُلياً !

وصلت عمارتنا , عمارتنا إلها مدخل بيجي وسيع شوي , أول ما وصلت سمعت صوت خطوات سريعة كإنو في حدا تخبى ! و سمعت حدا بحكي " اجت اجت " ! و كان الظلام حالك و الهدوء سائد و فش غير لمبة المدخل مضوية و بترمش !
أنا قلت في إنّا بالموضوع , في حدا مستني وصولي ! شغلت كل حواسي و وقفت تحت اللمبة و قلبي حسني إنو في اشي رح يصير ! 😳

و فعلاً صار !! 😳
فجأة من كل زاوية طلع مجموعة ناس بطبلو و بزغرتو , و اشي حامل كاميرات , و اشي فقع أنبوبة الزينة فوق راسي , و اشي بزقف , و اشي فرد سجادة حمرا , و أنا لسا بحملق بعيوني بدي استوعب شو بصير ! لا هو عيد ميلادي ! ولا هو عيد تخرجي السابع ! ولا هو عيد الشجرة !! 🌴
و فجأة من باب العمارة طلع ابن جيرانا فادي ! لابس بدلة و حامل كومة ورد و جاي باتجاهي و اشتغلت أغنية ( بدي ياكي انتييي بدي تكوني ماارتي إنتي هلأ صييرتي حبيبة قلبي) 😮😲
أنا لسا بحاول استوعب ! المشكلة اللمبة بترمش و مش قادر استوعب مين هدول الي حولي !
بس فادي من اول رمشة كهربا ميزته ! من مشيته عرفته ! 😍

معقول ؟ معقول كل هالهدوء القاتل بحياتي , و التصحر الصيفي الشمالي الفوق استوائي ! كان مجرد تمهيد ! كان مجرد تمهيد لهاي المفاجئة ! كان مجرد نهاية للتعاسة ! معقول لأول مرة ! خريف 2017 رح يبلش بكمية الدفا هاي !! معقول أنا لساتني مش غافية ع مكتبي بالشغل ؟ طب بلاش هسا يكون فادي بدو يسمي أول ولد إلنا عاطف ع اسم أبوه .. ! 😰

( ولكو مش هية ) , ( ولكو هاي بنت ابو كمال الي مسكر السطح و مانعنا نطلع عليه ) , ( روان قربت توصل تخبو تخبو ) , ( اف زيحي انتي غاد ) , ( لا و مسدقة حالها ) , ( مثقل دمك هس وقتك ) , (ممكن تزيحي عشان روان هسا بدنا نفاجئها ) , ( يا أخت هو بلله تتخبي معنا او تزيحي او تلاقيلك مكان ثاني تصفني فيه ) ,
الأغنية نطفت , و الكل رجع تخبى و همة بزتو هالكلمات , و اللمبة رمشت آخر رمشة و نحرقت , و أنا ما عرفت أي خيار أختار من هدول 😕
1 - أجهش بالبكاء ⭕💦
2 - أتسلل و اختفي بالعتمة السوداء ⭕👤
3 - أتحلل بمكاني أو أتحول لحرباء ⭕🐊
4 - أقتل روان و أخلي هدول الناس تعساء . ⭕🔪

#الخريف_السخيف
#مذكرات_بنت_منكوسة
#لما_صالح
...................................

- ركبت اليوم بالباص ، 🚌
و قعدت بالكرسي تاع اللوج اللي بكون اخر اشي ، قعدت بالنص ، انا بحبش هداك المكان بس مكانش في وسع !
المهم بس قعدت ، تطلعت ع يميني ، الا هو في شب بالزاوية جمب الشباك ، بس بيني و بينو بنت ، و هاي البنت راكية راسها ع كتفو ،
انا بس شفتهم نسيت حالي و قعدت اتطلع بكل وقاحة و اعمللهم مسح ضوئي بعيوني و أفصلهم ! فالبنت شافتني ، و جحرتني جحرة من قوتها قرنية عيني نغزتني و رمشي الشمال صار يفتح و يسكر لحالو ! 😳
بس أنا حدقة بعرف أتصرف ! عملت حالي بتطلع ع لون البرداي القرمبعي و لفيت وجهي عنهم شوي شوي و أنا بهز راسي و حاطة أصابعي ع خدي و دقني و عاملة حالي بفكر و بربط معلومات براسي و مش شايلهم من أرضهم قال ! 😌
بعدين بالعقل بدون ما ألف وجهي ، زحلقت بؤبؤي اليمين بهدوء ع إيد البنت ،
شفت دبلة ، اخدت نفس و حكيت ما علينا الله يهنيهم ، بس معقول لحيتو مش مشوكة صباحها ؟ أكيد مشوكة ! الحمدلله إني مش مكانها بطيقش الشعور يع ! 😣
فجأة تحرقصت و قشعر بدني و دمعو عيوني لإنو نمرة بلوزتي من ورا شوكتني ! و عرفت إنو تشويكة عن تشويكة بتفرق و انكسر خاطري الي كنت بحاول أجبره ! 💔👽
ما علينا ، لفيت وجهي ع شمالي ،
في بنت جمبي ، لفت نظري بوتها و صفنت فيه ..
طالت تلفونها و قعدت تكتب مسج ، أنا مو فضولية بس بعرفش كيف بؤبؤي الشمال سحسل لحالو الحيوان و قعد يقرأ غصب عني ! 😏
المهم ، كانت تكتب لواحد اسمو ( القلب مالي )
" حبيبي انا هيني ركبت الباص و رايحة ع رغدان "
أنا بس شفت هيك ، اخدت نفس برضو ، و طلت تلفوني
و دورت بين الأسماء ع حدا ابعتلو " أنا رايحة ع رغدان كمان "
بس ملقيتش حدا بفرق معو أنا وين أنقلع !
طلت نص دينار من جيبتي ، مسحتو بإبهامي ، و دمعت و قلتلو ..
" حتى إنتا هلأ رح تتركني ي حقير " 😊
وصلها مسج البنت ، بؤبؤي الوسخ دحدل لحالو مرة تانية و غصب عني !
" ماشي حبيبتي بستناكي ديري بالك ع حالك  " ،
حكيت بعقلي ريتو ابوكي يمسكك ، 😒
وقعت عيني ع ايدها ، الا هو في دبلة برضو ،
حكيت لا لهون و بكفي ! كل الشعب خاااطب !!
عندك عمو ، نزلني خليني أنقلع ع بيتي مشي تا ينشلو رجلي و أموت و ارتاح سنجل فور إيفر 😡
بس مسمعنيش السواق لإنو كان بحكي تلفون مع خطيبتو و اضطريت أمشي لعند الباب ونا بلاخم بين الكراسي زي البطريق السكران . 😊

#وحيد_في_زمن_خطب_فيه_العديد
#مذكرات_بنت_منكوسة
#لما_صالح_للشرب
..................................::::..........

- اليوم و أنا مروحة من دوامي ،
خليت التكسي ينزلني براس الدخلة تاعت بيتنا ، 🙈
مشان أكملها مشي ، مش لإني رياضية ! لا لا ، ولا عشان أوفر خمسطاشر قرش ! برضو لأ !
بس بهاد الوقت بكون موعد طلعة مجدي يغسل السيارة و يشطف الكراج و يقعد ع باب حوشهم و يولع الأرجيلة و يصرخ ع خوانو الي بلعبو بالحارة ، 🙊
فحكيت خليني أمرق من قدامو مشي ، لإنو ازا بمرق بالتكسي كالعادة بشوفش لبستي !
و المشي بكون أبطئ و بضرب عصفورين بحجر ، يعني بلحق أفتنو ، و أوقعو بشباكي و أخليه يحبني ، و أوريه كسماتي و مشيتي الي زي عارضات الأزياء ، 💃
فعلاً نزلت و مشيت و قعدت أزبط شالتي قبل ما أوصل دارهم ، و بالعقل عدلت زوايا الحومرة تاعتي بإصبعي الخنصر ،
و حطيت سماعاتي مشان أبين ثقيلة و غامضة ، مع إني ما بسمع اشي و أصلاً مو واصلتها بالتلفون ! بس حاطة السلك بجيبتي ،
و بلشت كل ما أقرب من دارهم أصغر خطواتي و أقصع أكتر بالخطوة و أتطلع عالسما ، قال إني سرحانة بالموسيقى الشاعرية الي بسمعها ، 💙🍃
و متل ما توقعت كانت مجدي حافي و رجليه مفشفشات من الشطف و مشمر بنطلونو لفوق ركبو ، و قطرات الندى تتساقط من شعر رجليه و كان بدخن مو بأرجل و ماسك قشاطة مركي عليها و قاعد عالرصيف ، 😍
أخوانو كانو بلعبو كرة ، و مسكرين الشارع ، بشوتو لبعض و نص لعبهم تطعيم !
أنا عملت حالي متدايقة و أنا بمرق من بينهم ، بلكي مجدي نهرهم و حكالهم مرقو الصبية ! 😏
بس مجدي أصلاً مشغول بتلفونو و ولا معبرني ! و القرود نازلين بدافشو بعض عالكرة !
الكرة الغضيبة دحلت جهتي و اجت عند رجلي ! و كلهم ركضو عليها ! و الكل هجمو يتطاوشو مين بدو يوخدها ! الي مسك شنتتي و قعد يشوت ، و الي ماسك بنطلونو و بمخط بكمو و بدفش فيني ! و أنا بينهم زي الفزاعة ! بروح يمين شمال ! 👋 👾👋
سماعاتي وقعت عالأرض و دعسو عليها و راحوو كملو ركض !
أنا نقهرت ، طملت طلتها ، و رفعت راسي و سبيت عالولاد ! حكيتلهم ( يئتعكم شو نور ! أهلكم ما ربوكم ! يا الله شو مئرفين ) ! 😡
أنا كل الي بدي ياه مجدي يسمع و يجي يبهدلهم !
مجدي سمع ، بس تطلع عالولاد و أعطاهم نظرة فرجوها النورنة الصح ! 😏
و فعلاً قعدو يسبو علي و يردحولي ، أنا حملت حالي و مشيت عالسريع و أنا معصبة و بدي أخلص منهم !
اجا واحد قرد طولو شبرين و لابس بنطلون رافعو لحلقومو ، و أصابع رجليه طالعات من شبشب الحمام تاع دارهم ! و وجهو بدبق لإنو ماكل نعنوع و واصلة جبينو ! 😖
هجم علي و شات الكرة و حكا ( يععن أبوتي ) !
الكرة اجت براسي و بكلة البف الي أنا نافخة فيها شالتي زاحت و صارت ع شمال راسي زي الي مدغم جنابي ،
لفيت وجهي الأحمر عليهم ونا روحي بمناخيري ، كلهم صارو يضحكو و هربو عند مجدي
و مجدي كان قالب ع كتافو من الضحك ! 💔

#عشانك_ي_بزييء_قبلت_التهزييء
#مذكرات_بنت_منكوسة
#لما_صالح