اليوم #عرس_صاحبتي_الوحيدة ....
كانت حلوة كثير، وطايرة من الفرحة وخاصة انها مع الرجال الي تمنته طول حياتها ...
وقفت وصفنت فيها، نزلت دمعتي، يا خلص رح تروح الي كانت تفهمني....
تذكرت انها صاحبتي من سنين طويلة،كيف كاسرة كل الحواجز الي بيني وبينها، ما بستحي اروح عندها الصبح؛ وافتح تلاجتها وابلش اكل واحكيلها جعانة وهي اللقمة بتمي وتحكيلي سم الهاري ! كلي شوي شوي !
ونصير نضحك ....
وكيف لما اكون مخنوقة من موضوع ؛ اتصل عليها تحكيلي مالك يا بومة، شو لي مزعلك، اقعد اردحلها ساعات، شوي نعيط، شوي نحش بنت مش عاجبتنا وندخل مليون موضوع بمووضوع، وبالاخر نضحك ونسكر التلفون !

شفتها بتأشرلي من بعيد، انا مسحت دمعتي وضحكت، طلعت لعندهها عاللوج، بحكيلها شو يعني اليوم بدك تشوفي حالك.علينا عشانك عروس ...
حكتلي ولك جعانة ... العرس بجوع!
انا حششت ضحك ، ولك فضيحة انتي!
همستلي مش رح تيجي معي اليوم!
لفيت وجهي وقلتلها التهي بعريسك ونزلت عن اللوج، وقفت بزاوية تكون وراها وصرت اعيط !

اه اتذكرت لما كنا نحكي بيوم عرسنا بدنا نوزع شاورما، عشان ما بنتحمل نضل بدون اكل.....
وكيف كنا بالجامعة مثل بينكي وبرين !
هي قصيرة وذكية وانا طويلة هبلة !...هيك كانوا يحكولنا ....
تتصل علي من الساعة 7 خبيت اكل من امبارح رح نفطر سوا اليوم !
وانا اطلع عالجامعة الاقيها جايبة نص الثلاجة نضل ناكل وما نشبع
وتحكيلي نجيب شاورما!
ومستحيل احكيلها لا .....

سمعت الديجي بحكي رقصة خاصة للعروس وصاحباتها ...

وقفوا كل البنات حواليها، انا رحت امسح دموعي، اطلعت عليها كانت تدور علي، بس شافتني تمنيت انه ما تخليني ارقص معها ما بدي اخرب فرحتها عليها، اجت مسكتني وصارت ترقص معي، انا احاول ما ابكي ، حضنتني وفرطنا من العياط .....
في بنت صاحبتنا اجت اخدتني عجنب حكتلي خلص مو مستاهلة ، هالايام في فيسبوك وتواصل، وكلها كم سنة وبتيجي تزورنا ....
صفنت .. بس كم سنة!

مين لي رح يجي يدق عباب بيتنا مثل الهجوم المسلح عشان هي زهقانة، مين لي رح تتصل بنص الليل تحكيلي انا جعانة ومفلسة اعمل اكل؛ واسب عليها وعاليوم لي صاحبتني في، مين لي بمكالمة وحدة ممكن تقلب مزاجي ....
هي صحيح رح تتزوج، بس حيصير عندها زوج ومسؤوليات، مش رح تضل تحكي معي 24 ساعة، وغير هيك هي رح تسافر !
يعني فش عيونها الي مثل الصراصير، ولا نظراتها لما تشوفني زعلانة؟ ما في عفريتة تنطلي كل شي يلا نروخ ناكل ... لمين رح اعمل سكرين شوت :'( واحكيلها عن دواويني اكيد حيتغير كتير شغلات

عارفة شو ... انا عارفة انه لازم اكون مبسوطلها وانه بيوم حروح انا كمان!
بس انا نفسي بهاللحظة ما نتزوج ، نضل انا وهي وبس!

حكتلي يا بنت الحلال انتي قالبتيها دراما حيجي يوم وتصاحبي غيرها وانتي رح تتزوجي وتلتهي ...

قلتيها حيجي يوم والتهي ، يعني مش حييجي يوم تنعاد في احلى صحبة

صاحبة اوثق انها اهبل مخلوق بالدنيا، مع هيك اكثر حدا فاهمني بالدنيا ، وبتعرف دواويني اكثر من امي ...

خلص العرس، طلعت بستها، حضنتها، عيطت عيطت عيطت وعيطت وتشحبرنا ، وودعتها وانا بدعيلها تعيش احلى حياة مع زوجها فرحتلها
...وبعد 3 سنين رجعت عالبلد انا كنت متزوجة وقتها، صحيح ما ضلت صحبتنا متل اول بس كل يوم كنا نحكي ...
جايبتلي الصورة ، وبتحكيلي شوفي اشكالنا قال بنعيط عبعض !
اطلعت فيها وقلتلها بالله ما اشتقتي لايام الجامعة وصحبتنا ...

قالتلي لا لشو بدي اشتقلك ، تعالي اخرفك شو صار معي بالغربة ...
بلشت تحكي ... سمعنا بنتها بتعيط .. قلتلها روحي شوفي بنتك ... مسكت بنتها وصارت تعيط هي كمان قلتلها مالك ؟
قالتلي: اشتقتلك ... جد اشتقتلك ..

الصحبة الحلوة ما بتتعوض، احنا مش بنخاف نخسر صاحبة لإلنا لانه ما في غيرها، لا احنا بنخاف نخسر كل الشغلات الحلوة والبشعة الي ما بتصير الا مع هالصاحبة الوحيدة الي فاهمتنا بدون ما نحكي