نعتذر بجد لكل المتابعين على تأخري في نشر الفصل رغم اني قلت اني حننشره من مدة طويلة فاتت..

الفصل فعلا كان مزال شوي ونكمله، لكن حاليا نمر بظروف صعبة جدا خلتني نوقف عن الكتابة رغماً عني..
في البداية توفى خال زوجي واضطريت نسافر لمدينة ثانية لفترة وبعد ما رجعنا أصيب زوجي بفايروس كورونا من حوالي شهر وتوا اصيبت أخته الوحيدة وحالتها سيئة نوعا ما نطلب منكم تدعولها بالشفاء العاجل💔

وزاد الوضع تعقد بعد ما حتى اني صرت حالة اشتباه، واليوم درت المسحة ورح تطلع النتيجة غدا او بعده وان شاءالله خير..دعواتكم😔

صعب نحكيلكم على كمية الخوف والتوتر اللي مريت بيه الفترة هادي مع تراجع صحتي وحالتي النفسية خصوصا اني في الشهر السابع من الحمل.. يعني فوق من مشاق الحمل وتعبه النفسي والجسدي حاليا زاد الوضع مع كل مرة يصير شي والحمد لله على كل حال..

ياريت تتفهمو وضعي وتعرفو ان مش سهل نهائي اني نكتب وننشر أي فصل سواء حاليا او من قبل.. فرغم حالتي الصحية طوال أشهر الحمل اللي فاتت كنت نحاول بكل جهدي اني ننشر الفصول وتكون بالمستوى المطلوب..صح مريت بفترات غياب طويلة، لكن كنت نحاول بالرغم من كل شي نضغط على روحي ونتجاهل تعبي ونفسيتي كله من اجل أن ننشر الفصل ونكون عند حسن ظنكم. لكن حاليا تعبانة بجد وخايفة على نفسي واهلي وبنتي اللي مزال مشفتهاش خصوصا بعد ما مريت بشعور الفقد وخسرت جنيني قبل حملي هادا ويارب ما يجرب حد الشعور هادا💔💔

اني من النوع اللي نهائيا منحبش نتكلم على حياتي الشخصية في مواقع التواصل الاجتماعي بصفة عامة، لكن رغم هادا حكيتلكم انتو بس على وضعي لأني نحبكم كلكم، وكانت رغبتي ان ما نخيبش آمالكم ونخليكم تنتظرو كل هالوقت بس الله غالب الظروف كانت اقوى من اني نكمل معاكم، ولأنكم بجد كنتم تدعمو فيا وترفعولي في معنوياتي في اصعب الاوقات، وتعليقاتكم المشجعة كانت تنسيني التعب والألم في اكتر من مرة فلهذا كنتم تستحقوا مني ان نفسرلكم شن صاير..

ربي يجبر بخاطركم زي ما جبرتو بخاطري ويبعد عنكم كل سوء ومرض..ما تنسونيش بالدعاء، وان شاءالله نرجعلكم في اقرب فرصة ونكونو كلنا بخير❤

دمتم في أمان الله وحفظه🌷