- #مذكرات_بنت_ناصحة
(الجزء الأول ) ..

" هاي المرة الستة و السبعين الي بقرر فيها أنزل وزني ،
مع إنو بيني و بينكم بطل فارق معي ، ينزل يطلع يتدحرج ! بطلت سائلة ! ✂
أنا شخصياً من جهتي تكيفت مع موضوع السمنة و الأوزان الثقيلة ، أصلاً شو يعني سمنة ؟ ظاهرة عادية أي بني ادم معرض إلها !
و انا مش أول ولا آخر وحدة بكون عندها 100 كيلو زائدين عن الحاجة ! 🐥
أصلاً كمان ضربت صحبة مع الدهون تاعوني ! أطيب ناس ! دايماً معي ! عالمرة و الحلوة معي ! الوحيدين الي متمسكين فيني بقوة ! ولا برضو يحلو عني حتى لما أوقف عالمراي و أضل أسب عليهم ! بزعلوش مني ! 💓
بعدين يا عمي الي بيجي من ورا الأكل يا محلاه ! لو بزبط أجمع دهوني كلها و أحطها ع راسي احتراماً إلها بقصرش !
الناس ازا بدهم يعايروني ، أول كلمة بحكوها ي بقرة ! مالها البقرة ؟ مفيدة أكتر من كل الناس الي قابلتهم بحياتي ! 👌
عالقليلة البقرة بتنقلش حكي ! ولا بتخون ! ولا بتحب نص شباب الأردن بنفس الوقت ! ولا بتلبس حجاب ع فيزون ! ولا بتخطب و بتوكل راسنا بخطيبها ! ولا بتضل تحكي الناس حسدوني ! ولا بتحكي حبيبتي القديمة ماتت !
ولا ي عمي بتوكل الكتب و بتيجي عالامتحان تعمل حالها مش دارسة زي بعض ناس ! 🐄
البقرة أحسن من كل هدول ! و نفس الحكي بنطبق عالدببة و البطاريق و أي حيوان مربرب متلي ..
مع هيك و بالرغم من كل هالمحبة الي تولدت بيني و بين رطاريطي و الأبقار ، امي مش راضية تقتنع ! ما بتفتح معي مواضيع غير عن نصاحتي أو عن نحافة رانيا بنت بديعة الرمحي الي بالحارة الي جمبنا ، 🔨
بعرف بدها تخلص مني ! خايفة أضل أنا و دهوني نتمدد و ننتشر و نحاصرها بالبيت لآخر العمر !
آخر مرة فاتت علي عالغرفة الشر بقدح بعيونها ، كنت موصي ع وجبتين شاورما دبل ، نازل فيهم معط ، ونا قاعدة ع تختي المكسور و طابق عالبلاط ، ⛄
لسا بحط شقفة الشاورما بتمي الغاطس بين لغاليغي ،
اجت سحبتها من ايدي بكل عنف ! حتى طارت شقفة مخلل عليها مايونيز ع دقني المليان و سحلت عليه و وقعت ع كرشي !
و أخدت كمشة البطاطا من ايدي التانية و هي معصبة و رمتها جوا العلبة ، و حملتهم و طلعت و هي بتردح مع حالها ! 😳
بعد شوي ونا لسا مصدومة ؛ رجعت عالغرفة لابسة عبايتها و قالتلي يلا قومي ! اخدت موعد عند اخصائية تغذية ! جمعي أطرافك و قومي ، اصحي تنسي فخدة من فخداتك !
ما رح أقضي عمري أفصلك برادي مشان تلبسيهم !
المهم جبرتني و رحنا ، ع قولتها انها اخصائية شاطرة و رح تنحفني قبل الصيف الجاي ، و بكون ع موسم الأعراس جاهزة مشان أنطلق و أنتشل عريسي من تحت الأرض ! 🌱
فتت لقيت وحدة مسلوعة مسشورة شعرها لابسة نضارات و شفايفها كتير رفاع و وجهها فيه تجاعيد عالخفيف ، قعدت و بلشت تسألني أسئلة بتفتح الجروح ..

يتبع في اللغلوغة الجاي .
#لما_صالح
.................................

#مذكرات_بنت_ناصحة
( الجزء التاني ) ..

" دايماً الناس الي عندهم وزن زايد متلي ، بحطو الحق عالأكل ! بنرضاش نعترف انو إحنا الي ظالمين الأكل و بنعمل فيه مجازر ! مع إنو الأكل اشي لطيف و بخفف علينا وجع هالحياة ! 🍨🍰
بس أنو لطيف يما ؟ عليم الله أنا بقومش عن الأكل غير لما أحس معدتي بتزقف و بتترجاني أوقف ! 👐
حتى لما أقوم عن السفرة بقومش زي الناس الطبيعين ! برخي حالي ونا عالكرسي و بميل شوي شوي لليمين تا اوقع عالأرض ، بعدين بصير أدحل حالي و أتدحرج تا أوصل غرفتي ونا ماسك فخدة جاجة أتسلى فيها بعد المعركة !🍗

صراحة ما بقهرني غير الي بيجي يلومني و يقلي " ليش هيك ناصحة ؟ انحفي ؟ لمصلحتك ! لو انا مكانك بنحف بأسبوع ! بطلي أكل ! ي ريت مشكلتي اني ناصحة متلك كان زمان نحفت " .. ! 😬
كل هدول بكون نفسي و همة بحكو امسك شلاطيفهم و أسحبهم لورا راسهم ، شلطوفة من فوق و شلطوفة من تحت اسحب ، و أكبسهم بمكبس من ورا ! 👊
ياخي زي ما في بنات نقطة ضعفهم الأتراك و بقلاوة ، و زي ما في شباب نقطة ضعفهم ريحة البنات و الدخان !
أنا نقطة ضعفي الأكل !! أنا بضعف ، بقاومش حتى لو خدودي طبقو ع بعض من النصاحة بقدرش أمنع الوحش الي جواتي ، مش بهالسهولة رح أقدر اترك اشي انا بعتبرو ملاذي الوحيد بالحياة ! 💔
أشوف روحي اتركي حمودتك الي طول نهارك تترجيه يضل معك ! أو أترك شغلك الي طلعلك ريش تا لقيتو ! أو طلق مرتك الي بضت ونتا تحوش مشان تخطبها ! 😏
لو قصتي أنا كمان سهلة كان ما بستناكي تا تيجي تنصحيني يا مسلوعة ! عضام خدودك مع الكنتور عاملين أحفورة نادرة لديناصور بوزو مثلث بطريقة خلتو يقرض حالو من حالو ! 👊

لما امي أخدتني ع اخصائية التغذية ، ضلت قارصتني من كوعي و مقربطة بكتفي ونا أحاول أقوم مش متحمل كمية الاستفزاز !
وحدة مسلوعة بتيجيش تاتو ع كتفي ! قاعدة بتحكيلي كلام تحفيزي مستفز لأبعد الحدود ! 😣
" يلا مشان ننحف بدنا نبتل نااكل الأخدر و اليابس ؛ و بدنا ريادة ! بزبتش ريجيم بدون ريادة ! ما بدنا نتعشااا ، ما بدنا أكل جاهز ولا رز ولا خبز ، شاورما مش مسموووح ! بطاطا لأ ! شوكولاتة نوو ! بدنا نعمل حرب مع الكالوريز ! من يوم و تاالع بدنا خداااار ! خدار و فواكي مشان نصير رشيئين ! " 👾
هي حكت ( رشيئين ) أنا قلت بس ! قمت و نفضت إمي عن كوعي ، الحمدلله في ضهر كنباي لقطها ولا كان صارلها اشي المخلوقة ، 😰
قلت للأخصائية ولله مني دافعلك و طلعت ، بدها تقتلني ؟ قال لأ شاورما ؟ من كل عقلها !
يا عمي يجعلو لا حدا صار ( رشيء ) !
امي اعتذرتلها و نزلت تلحقتني ، و زي المسلسلات ، صفعتني كف ع باب المبنى ! 👋
طبعاً كان التصوير بطيء ، لإنو لغلوغي بوخد وقت و هو يلف عالجهة التانية من الضربة !
انا ما حسيت بوجع جسدي ، قد الوجع المعنوي الي حسيتو ! خصوصي انو امي بعد ما ضربتني الكف ، حطت ايدها ع ضهرها و توجعت ، خوف الله عصعوصها انكسر من الرفسة الي رفستها ياها فوق ! 💔
حسيت قديش انا مدايق امي ع حالي و متعبها معي ، و قررت من هديك اللحظة ، أنهي هالمعاناة و أريح امي .. "

يتبع باللغلوغة الجاي برضو .
#لما_صالح
....................................

#مذكرات_بنت_ناصحة
( الجزء التالت ) ..

" الرياضة كانت حلي الأخير ، هاي المرة بلادتي و نياطتي بدي احطهم بكيس ، و أحرقهم ! 💪
قررت أعتبر حالي رجل آلي ، و انسا كل مشاعري تجاه الأكل و التخت و الكنباي و النوم و كل اشي ممكن يرخي دهوني و يفرفدها !
بدي أشوف الناس الي قلقانة بوزني ، بشو بدهم يقلقو بس أنحف ! 😏
الجيم كان مكان مشجع ، لانو فيه كتير ناس زي حالتي ،
بس لولا هالبراغي الي بتكون تحسس عالأجهزة و تمر من بين فخادنا !
أنا قصدي عن البنات النحاف الي جايات ينصحو ! بديش أعمم ، بس في وحدة رحت ما أقتلها ! 🔪
كنت قاعدة بستنى جهاز من أجهزة المشي يفضى مشان أشتغل عليه !
بس فش ولا واحد فاضي ! بعد معاناة طويلة شفت جهاز فضي من بعيد ، عالسريع طملت حملت شنتتي و بشكيري و قارورة المي الي معي ، و حاولت اركض عليه بس الجاذبية الأرضية كانت قوية و أخرتني ! 🌎
قبل ما اوصله بشوي سبقتني وحدة للحظة فكرتها سلك شاحن !
كانت لابسة فيزون ، الفيزون بحزن طبعاً ! لإنو مش لاقي اشي يمسك عليه من نحفها ! 🐍
طلعت عالجهاز و حطت سماعاتها، لو فيزونها لونه مش بطيخي فاقع ، كان فكرت الجهاز اشتغل لحاله لإنها مش مبينة !
أنا قلت هسا خمس دقايق و بتنزل خلص خليها توخد دوري ..
قعدت قبالها عشان تعرف اني بستناها ،
الخبيثة عرفت اني بستناها و براقب فيها تخلص ، بلشت بدها تستعرض ! شغلت الجهاز و طلع صوت دبانة ، الي هو صوت خطواتها عالجهاز ، و صارت تأفإف و هي بتركض و تهوي ع وجهها و تنفخ قال تعبانة ، 🐍
و تتطلع علي نظرات و تقلب عيونها !
أنا استهديت بالله و قلت سيبني منها ، عامودي الفقري أعرض منها !
مرق خمس و عشر دقايق ولسا بتنطنط عالجهاز ، صارت ربع ساعة و الأخت مش راضية تستحي ، قبعت معي و قمت حطيت اصبعي ع كوعها و نقرتها بما معناه يلا ، تطلعت علي و حكتلي " لسا مطولة ، شوفيلك جهاز تاني " ( و بتحكي بقرف السحلية ) ! 😳
أنا هون عصبت و حطيت اجري ع الجهاز وقف ! و هي طارت لورا خبطت بالحيط ،
و طلعت أنا عالجهاز ، قامت البنت صارت من حرتها تردح و تزت حكي ، أنا ضليت مطنشها مشان حجمها ، ضليت اركض و بلشت أتعب و أعرق ، للحظة حسيت ملامحي صارت تنقط ، يعني تخيلت عيني رح تسحل مع عرق جبيني ! 😪
و هديك ام اربعة و اربعين لسا بتمر و بترمي حكي !
خلص مصرة تعمل عملية انتحارية ! قدرت أطنش لحد ما قالت إني غيرانة منها و قعدت ترميلي أدعية حسد ، هون طار عقلي ! لإني مستحيل اغار من الجفاف تاعها ! 😳
طفيت الجهاز و نزلت اركض عليها ونا عرقي بزرب ، البنت كل فكرها إني ما رح أعمللها اشي ! بس تعبير وجهها و هو عليه الصدمة لما حملتها و حطيتها عالأرض و قعدت عليها كان حشيش ! 😂
قعدت و ريحت عالآخر ، و صارت هي تصرخ و الكل اجا يشيلني عنها !
ونا قاعدة و متكتفة و مش عامل أي تعبير ع وجهي ! و قعدت أمسح عرقي ببشكيري و همة مش قادرينلي ، 💪🐊
البنت بعد هيك ما شفتها أبداً ! ما بعرف ازا بطلت تقدر تمشي أو صابتها أمراض نفسية بعد الفعصة و التجربة الصرصورية الي عاشتها ! 💀🐜
مع هيك بشكرها هي و أمثالها و آلاف الأشخاص الي مرقو بحياتي ؛ سواء استفزوني أو جرحوني أو أحبطوني أو حتى كانو سبب بكرهي لنفسي و لمشكلتي !
لإني لولاهم ، ولولا الاجهاد النفسي الي تعرضتلو بسببهم ، ما كنت بيوم نحفت أو حتى خففت من وزني ! " 💙

- شو ما كانت مشكلتك بالحياة
تزكر انو الناس السيئة و الظروف الأسوأ الي بتمر بحياتنا هي النعمة الي بتصنعنا .. 🍀
- بنفكرهم حاجز بس همة حافز .
#لما_صالح