- أنا مكنتش شاكة فيه , ولا شامة ريحة ديل بيلعب ! 😕
ولا شايفة أي أعراض خيانة ! ولا حاطة احتمالات حتى !
أنا هيك عن هبل ! صدفة ! بعفوية ! الله يوخدني و يوخد عفويتي ! حبيت اعمله اختبار , من كتر ثقالة دمي ..
بدي أثبت للكوكب إنو زوجي وفي و عينه مليانة مدحوشه دحش مني , حتى إجري ملهمش وسع مدندلات من بين رموشه التحتانيات ! 😍

صبحت أعمل أكاونت عالفيسبوك , سميته (إمرأة نمرودة) , و حطيت صورة وحدة نايمة و حاضنة حرام أبيض و مسحلة شيال فستانها عن كتفها , و حاطة مكياج سهرة , كنوع من التمرد و الإغراء و الأنوثة الطاغية ! و عبيته صور و أشعار عذبة تلامس القلوب و تداعب الأحاسيس , و نداءات حب غير مباشرة ! 💘
و استنيت زوجي تا طلع ع شغله و بعتله مسج كالآتي :
" مرحبا , بسير اعترفلك إنك كَرجل أسرت حواسي و كل أطرافي حتى خلايا نخاعي المشوّك عم تنطئ اسمك ؟ بس ئصة إنك متجوز كتير حرئت ئلبي , مع إنو من جهتي ما بهمني  ~ ! " 🔥
بعتت المسج و قعدت أحوص و ألوص بالبيت و استنا رده بفارغ الصبر !
آخر اشي غرشت عن التلفون شوي لإنو الخزان فاض و طلعت اتفقد العوامة بتوب الصلاة و التهيت مع جارتنا ,👣

بعد ما نزلت شلت اليانس بسرعة و استلقيت ع بطني عالكنباي و فلتت الزنوبة من رجلي كل وحدة بجهة , و فتحت تلفوني لقيته عامل سين من ساعتين و مش رادد اشي و لا معبرني ! 😳
قلبي صار يضخ عصير برتقال من الفرحة , بنكرياسي صار يوزع كنافة , هرمون شوفة الحال زاد عندي , بسرعة صورت الشاشة و بعتتها ع جروبات صحباتي و قريباتي ع الواتساب و كتبتلهم " شوفن انتي وياها شوفن , طول نهاركن تسبو عالزلام و تحكو غدارين ! أتأملو الصورة و ركزولي من متى ال (seen) معمول ! يا عمي الزلام بدهم وحدة متلي عشان تضب عيونهم ! تحطِّنش الحق دايماً ع زلامكن يخي , كل وحدة تشوف منظرها " 😌💥

رحت ركاض عالمطبخ ونا نافش كل دهوني زي الطاووس و بلشت أحضر مائدة الحُب و الحنان و الثقة اللي معمريش سخيت و حضرت زيها من قبل , ركاض ركاض قبل ميوصل حبيبي الصادق الأمين , 🏄
شوي إلا هو داخل و استقبلتو بقصيدة ألفتها ونا بفرم البصلات ,
هو مش فاهم اشي من الطبخة , قعد يوكل من البطاطا عالواقف , و قلي دقيقه و راجعلك حياتي , 😚

أنا مبسوطه و قاعدة بحضرله بصحنه و نا ابتسامتي من الغرة للصرة , و قاعدة بدعي يجي يومي قبل يومه 💞🔥
فجأة بوصلني مسج ع حساب (إمرأة نمرودة) , فتحت , لقيت مسج من (عاشق دلع النساء) , مكتوب فيها ,
" إنتي أسرتيني و عصرتيني و شليتيني كمان ! أنا الي بعتيلي مسج الصبح هاد أكاونتي الثاني , وحياتك ولا أنا بهمني إني متزوج , وينك من زمان , نحكي فيديو كول عال2 الليلة , ثعلبتي نومها ثقيل لا تخافي ؟ " 💃

#الكائن_الخائن
#مذكرات_بنت_منكوسة
#لما_صالح
.....................................
- هي ع اساس كانت صاحبيتي ! 👭
كان الكل ناقز من صحبتنا ! حتى صحباتي التانيات ! كانو يحكو مع حالهم من الصدمة ! صابهم حكة من الغيرة ! كل ما يشوفوني معها يصيرو يهرشو !
غيرانين كيف أنا وياها فجأة صرنا ما بنقدر نعيش بلا بعض ! 🔥
أول مرة قعدت فيها جمبي كنا بأول الفصل ، فتحتلي سيرة حبيبها الي تركها مع إنها طيبة و ما بتإذي نملة ! و أنا تعاطفت معها و قلتلها كل الشباب اوغاد !
بنفس اليوم روحت لقيتها منزليتلي بوست عالفيسبوك :
( و اخاف يا صديقتي من حياة لا تكونين فيها قربي ! ) 💙💔💝
و من يومها ما كنا نرد ع بعض غير بستكرز الكلاب الي حاضنين بعض ! و الكلب الي بلحس الشاشة و بعمل قلب حب بريالته !
قززنا الكوكب البشري بوستات و منشنات و تعليقات و مسجات و صور كل دقيقة صورة النا و لإجرينا و لإيدينا ! الخاطبين حطيناهم بجيبتنا ! الي كان يشوف غزلنا ببعض كان يقول هاد اذا بتندعس وحدة منهم التانية بصيبها إيدز بدينيها !
كنا مش مقصرين لا انستغرام ولا فيسبوك ولا سنابشات يعتب علينا ! 👼

عدى الفصل تقريباً بثبات و نبات ! تقريباً مصروفي كان رايح ع هدايا و كاسات نسكافيه و قناني مي و سندويشات شاورما و سووس إلها ! بس كنت مبسوطة ع حالي و مش شايفة أبداً النقطة الحمرة الي ع صباحي  ! قال إني صديقة تمتاز بوفاء الكلب ! بس لا اكتشفت إني لا امتاز بالوفاء  ! أنا بس كلبة حاف ! 🐩
لإنو تدريجياً بطريقة غريبة صرت ألاقي كل صحباتي و زملائي ببعدو عني ! و بختصروني ! أنا سقت فيها إنهم غيرانين ! و بحبوش أصاحب غيرهم ! و إني انا مسكينة و كل القصة إني صاحبت بنت مسكينة متلي ! 💛

ما كنت عارفة أبداً إني الي مصاحبها و بدافع عنها ( أفعى كوبرا بتقنية إتش دي هاي كواليتي اف اربعطاش من تحت لتحت ) ! 🐍💐
كانت خادعتني بصورة مش طبيعية ! طوق الورد الي كانت تحطو بكل صورها كان عاميني عن قرون الشيطان الي فوق زوايا حواجبها الحادة ! 👹👺
اكتشفت عن طريق الصدفة الصديفة ! إنها كاينة تنقل كل قصصي و كلامي لكل صحباتي مع التبهير و التتبيل عشان هيك كرهوني ! اكتشفت إنو الشب الي كنت بحبه من طرف واحد و بحاول أوقعه بفخاخ غرامي ! قايلتله كلام مش ولابد عني عشان هيك مش لاد ع خلقتي ! مع إني كنت مفكرة السبب قصة غرتي ! حتى غيرتها 3 مرات عشانو تا صارت اعشاب طحلبية متدندلة ع اطراف جبهتي ! 👽
بس ما خطرلي أبداً إنو الي أنا مخزنة اسمها ع تلفوني ( أنتيمت عمري شحطة قلب حب ) هي الي عاملة كل هاد ! 💔
عدا عن صورتي الي و انا برقص ولابسة دشداشة اخوي و شعري فيها عامل وقفة صمت و حداد ! باعتيتها لكتير ناس ! منهم الشب الي بحبه ! و قايلتله إني كاينة شامة تنر لما صورتني هالصورة ! 🍺
طبعاً انا من الصدمة لما اكتشفت هاد الحكي كله ! روحت عالبيت و أنا بزحف ع ركبي و بطلع مني صوت أنين القطة ! ذليت و معرفتش ايش اسوي !
لإنو حتى صحباتي خسرتهم بسببها ! 👤
و المشكلة الأكبر إنها هاي الثعبانة التعبانة ، عندها بلاوي صور و ريكوردات حكي و سكرين شوتات إلي ! بتوديني فيهم ورا الشمس بعد تقاطع الثقب الاسود عاليمين ! 🌐
يعني أنا ممسوكة من ركبتي الي بتوجعني حالياً !
ما عرفت اقرر صراحة ! أطعميها قتلة من تبعون الترفيش بالبطن !
هيك أعمللها ياها مفاجئة بكرا بما إنه آخر يوم دوام ! اخلي أهلها يمضو العطلة دايرين فيها عالشيوخ و الدكاترة و المشعوذين ! و ما يلاقوا حل لطعجة بطنها ! ولا تقويم يزبط لسنانها المثلثات ! 👊💢
أو أقلها امسحي صوري و أنا بقولش لحبيبة حبيبك الجديدة إنك انتي الي بعتي صورتها لأبوها و هي قاعدة مع حبيبك تحت الشجرة ! 💨
او اهددها عالتقيل و أقوللها ببعت لأهلك قائمة أعمال الفصل تاعتك ؟💦
ولا اختصر لإنها حية و مستحيل أطلع معها براس و ألبس عباي مشحبرة من تحت و أروح أترجاها زي حياة الفهد ؟ 😢
أنا شو وقعني مع شعشبونة تاعت أبطال الديجيتال ؟

#عالفيسبوك_حبيني_عالواتساب_هدديني
#لا_يغرك_هيني_بقلك
#لما_صالح
........................................................

- مرحبا , أنا ما فاتني القطار , القطار دعسني أنا !🚅⚡
اليوم رحت مع إمي ع مباركة بنت بعيلتنا عمرها 15 سنة ! اه سوري مو بنت , قصدي المدام ( سوسو موااح إكس دي ) , هيك كان اسمها عالفيسبوك قبل عرسها بتزكر ,
المهم فتحتلنا إمها و دخلنا , بعد التسليم و التبويس , قعدت جمب إمي بين هالنسوان و عم الهدوء بالقعدة , و احنا بنستنا العروسة تشرف ,
تطلعت حوالي ؟ لقيت كل العيون علي و بتوشوشو و بجحروني ! 😰
حسيت حالي قملة , أو دخيل ! حطيت غرتي ورا داني شوي شوي و نزلت بؤبؤ عيني ع أصابع رجلي و قعدت أعد فيهم من كتر ما أنا حاسة الوضع غريب و بدي ألهي حالي !
فجأة حجة قاعدة بالزاوية أيديها و إجريها محنيات و شعرها أبيض و فيه خصلة برتقالية و أتوقع من التفاصيل الي بوجهّا أقل اشي ملحقة الديناصورات بآخر أيامهم , قالت لإمي  " قديش عمرها العصفورة " 🐦
حاولت أوضح إني مو عصفورة بس فضلت أضل صافن بأصابع رجلي ,
إمي ابتسمت و ابتهجت و حطت ايديها ع كتافي و قالت :" 24 سنة , بتدرس بالجامعة طب اسنان " 💃
الحجة رفعت حاجبها و مسكت مسبحتها و أخدت نفس كإنها سمعت بعلامة من علامات يوم القيامة و قالت :" آه , يا ستي , الله يستر عليهن "
حسيت للحظة إني ممسوكة بقضية إدراة و تنظيم سلسلة بيوت مشبوهة , أو مخرجة أفلام للكبار فقط ! 🔞
بعدين طمنت حالي و قلت بسيطة يمكن عشانها كبيرة بالعمر ! و لساتها عالتحديث القديم ,
فجأة الا فايتة العروسة , وحدة طولها شبرين بتشبه ماروكو , بس حاطة اشي بلمع فوق عيونها و ع خدودها و معبى ع كتافها ريش و لابسة كعب بعمل بواسير من طوله , 👽
و كل النسوان فجأة انبسطو و صارو يصلو عالنبي و يتأملو فيها بكل فخر , أنا ما تفاعلت مع الموضوع ببساطة لإنو مو من اهتماماتي ! و كنت بلعب لعبة ع تلفوني و كل همي أفوز بالمرحلة و أقتل الشعشبونات البرتقالية ! 🐞
بس إمي نقرتني من كوعي و جحرتني بما معناه سيبي التلفون ! سبته و رفعت وجهي البريء و صرت أتطلع حولي ! ☺
لقيت إم العروسة بترمقني نظرة حسيتها ولله العليم قاعدة بتقرأ الفلق بوجهي ! و كمان شوي بدها تبخ بوجهي أصابعها الخمسة ! خفت من حواجبها و لفيت وجهي ع نسوان تانيات , لقيتهم بنظرولي بأسف ! كإني انخلقت بدان وحدة , أو عندي خزق واحد بأنفي ! أو في اشي ناقصني لا سمح الله ! 💔
قررت أتطلع عالعروس نفسها بلكي شوي صار الوضع عادي , جحرتني العروس و طيرت شعراتها عن رقبتها بإتجاهي ! و قلبت عينيها مع اللميع الي حوليهم بينت كإنها ضربت شرت كهربا ! قال إنو شافت حالها علي هيك ! 😳
و أنا مش فاهم مال لغاليغهم هدول ؟ بالله جد مال نخاعهم الشوكي ! مال أرداف دماغهم ؟
رجعت نزلت بؤبؤ عيني ع أصابع اجري و صرت أقارن أوجه الشبه مع أصابع اجرين إمي تا يعدي الوقت و أخلص و نروح ! لما طلعت من دارهم حسيت حالي كاينة راكبة آلة الزمن ! و منتقلة ع أيام الجاهلية ع دار  أبا العتاهية ! لازمني غسيل دماغ بدوا قمل من التلوث الفكري الي شفته .

- هل يستوي الذين يدرسون و الذين الريش يلبسون ؟

#الزواج_المبكر
#جاهلية_باك_ستيج
#لمآ_صالح