هبه وعصام ١
عصام و هبه كانو زي السمنة عالعسل ، جوز عصافير ، جوز كنار ، طقم زغاليل ، والهوى عليل ، وابراهيم خليل ، تفاهم ، ع انسجام ، ع علاقة مرتبة!
بس هي شوي بتغار و شكاكة ، يا عمي هي شكاكة شو تعمل؟ تنتحر؟! تشرب بنزين؟ تنصبلو كمين؟! بس هي كانت ع يقين!
عصام شاطر ، و حدق ، وفهلوي ، خاين وكذاب وابن ستة وستين محترم ، بس صاحي ، وما بتقدر تمسك عليه ممسك!
هو لانو تجوزها تقليدي ، ليش تجوزها؟ لانو كان يحب سوسن ، وسوسن حلقتلو بيوم من الايام ، رمتو رمية بشكير الحمّام ، بس هي ما بتنلام ، ليش!؟ لانو كذاب وشغل حكي ، واليوم وبكرا !
ف سوسن راحت سافرت ع دبي تشتغل ، وقالتلو اطلع من راسي ، ووجودي بحياتك مش اساسي ، ف هو بعد كم شهر ، قال لإمو يما بدي اتجوز ، امو كانت حاطه عينها ع هبه ، لانها طويله وشعرها حلو ، مره شافتها ب حفلة حنّا ، وقالت هاي لازم تكون فينا ومنّا ، وهي بتتفتل بين المعازيم ، حطت عينها عليها وقالت هاي ل عصام فش مجال!
المهم شافتلو ياها ، وخطبتها ، وقرأو الفاتحه ، وحبو بعض ، وانبلو ببعض واتجوزو ب اسبوعين ، صار عصام العزيز الغالي ، الشريك المثالي ، ابن عمي وابن خالي ، وانا ساالي سالي!
سوسن وهي عالفيسبوك ، لمحت صورة اثنين عابطين بعض وفوق راسهم قلب حب ، قالت مش هاد عصام؟! يا ابن المفاصيم ، متجوز وبترقص بين المعازيم!! ولك عالحساب معكاش توكل ، ومن وين اجيب! والعرس بدو ترتيب ، وحفلة وخلفة وولاد وحفاضات وحليب!
سوسن خف عقلها ، اوك هي حلقتلو عالناعم ، بس مش هيك يا ظالم ، كان استنيت سنة عالقليله ، بعدين قلت يا فليلة!
المهم بعدو رقمها معو ، فاتت عالواتساب وكتبتلو حسبي الله ونعم الوكيل فيك يا حقير المزارع ، يا واطي الشوارع ، يا تمثيل المصارع!
هو شاف المسج ، عالسريع دخل عالاسماء ، وغير اسم سوسن ، وكتب بدالو : مجدي الحلاق!
ليش عمل هيك؟ مشان هبه ما تشوف مبدئيا ، وما تقرأ اسم سوسن !
كتبلها سوسن انا اوك تجوزت ، بس من حبك ما تحررت ، وحياتك كلو ديون وقروض والمفروشات عروض!
سوسن قالتلو ولك بعدك بتكذب، ولك ارحم حالك ، ولك مالك مالك؟! قلي انك كنت تحبها!
حلفلها مليون يمين انو ما بحبها ، ولا طايقها ، وامو نقتلو اياها ع عماها !
انا بحبك يا سوسن ، بس شو اعمل!
اجت هبه من الغرفه الجوانية ، لابسة اللي عالحبل ، وحاطة ميك اب double ، شافها عصام ، انعجق وسكر الموبايل عالسريع!
هي انتبهت ، بس اختصرت ، بدهاش اياه يعرف ، قالتلو مالك في اشي، قلها لا هاد مجدي الحلاق ، بسلم علي!
انا حكتلكو عن هبه انها شاطره ، وبتلقطها عالطاير ، ودايما دمها فاير ، بس بلعتها واختصرت ، خلي هالسهره تمر ع خير ، بلاش يصير في ضحايا!
قعدت جنبو ، سوسن بعتت مسج كتبت فيه : إشتقتلك !
الاسم طالع مجدي الحلاق!
عصام صار يضحك ويقول ، يفضح عرضك يا مجدي شو عليك نهفات 😂
شوفي قال مشان اروح احلق كاتبلي إشتقتلك ، مش ضايل الا يقولي شكلو مرتك جنبك 😂
هون هبه برضو بلعتها ، وقالت بعقلها ، بدي اصبغ شعري ازرق اذا هاد مجدي الحلاق ، ولكو بدي اقص رموشي واوزعهم عالاشارات ، اذا ما هاي بنت من هالبنات!
#هبه_وعصام
#عمر_زوربا
......................
عصام بلع ريقو ، وعمل انو فش اشي ، وقال موضوع مجدي الحلاق شكلو مشي!
هبه قعدت ، جنبو ، ومسكت الريموت ، وعين عالشاشة ، وعين على عصام ، وانتبهت انو انعجق وفات بالحيط ، وانها مسكت طرف الخيط !
شايفيتو محتار ، وانعجق بالتلفون ، ومش منتبه عالتلفزيون ، وانتبهت عليه ، مسك الموبايل بالعقل ، وفك القفل ، وطفى النت!
هو غلط وطفى النت ، وهي هون تأكدت انو القصة فيها بنت ، خف عقلها ، بس هي ساهيه لاهيه ، هي عباره عن عقربة مدرّبة ، على مين يا عصام؟ ولك وهي قدك كانت بعشر زلام ، ولك انتا جاي تسرح ب هبه ، ولك انتا مش عارف مين هبه ، ولك الخيل والليل والسيل والميل والبيداء تعرفها ، ولك روح اسأل عن هبه ايام المدرسة ، اسأل مين هي اللي كانت مسيطرة ع ٥ صفوف ، على شلاليط وكفوف ، وشوف يابا شوف!
هبه سألتو ، ليش طفيت النت ؟ شكلو مجدي الحلاق بزعجك؟!
قلها لا اه مين لا وين انو لا مين لا !
قالتلو مالك انعجقت وتكركبت وتكهربت ! عكل حال صحيح ، الحلاق اللي بحلق عندو اخوي حمزه ، سافر عالسعودية ، اسكت مش عمو فتحلو صالون هناك؟ وقلو تعال انا بدي اتبناك ، هي صالون والشغل عالنص !
اعطيني رقم مجدي الحلاق ، لانو شكلو حلاق شاطر ، وحلاقو مسافر ، هيو مبين من سوالفك انو شاطر ، عاملك اياهم مساطر !
انعجق عصام ، عصام خش بالحيط رسمي ، عصام نشف دمو ، وشوي بدو يرن ع امو ، قلها انا ببعتو لاخوكي حمزه واتساب!
قالتلو هبه ، بدي اقوم اعمل قهوه ، بدك قهوه؟!
قلها اه اه بدي! المهم قومي من عندي!
هي ليش قامت؟! لا عشان قهوه ولا بطيخ ، بس بدها ترن ع اخوها حمزه وتفهمو الطابق ! رنت وقالتلو القصة ، وشرحتلو قديش في بقلبها غصة !!
وهي بالمطبخ ، عصام فتح النت ، ولقى سوسن باعتيتلو مسجات ، مسبات وعتابات واهات وولك ليش طافي النت ، بتخاف منها؟ عالحساب؟ ولك طول عمرك كذاب!
المهم اجت هبه وقعدت ، الا هو حمزه ببعت لعصام مسج واتساب : ابو نسب بدي رقمك الحلاق مجدي صاحبك ، هبه حكتلي عنو ، وبدي استفسر منو!
هون عصام لو يصحلو يطعن حالو ما بقصر ، ليش؟ لانو اصلا فش حلاق ، وفش اصلا حلاق اسمو مجدي ، الحلاق اللي بحلق عندو اسمو وائل !
هبه قالتلو ، مالك ابعتلو ، وهي حاطه راسها فوق التلفون ، وما بتتحرك من هون ، يلا ابعتلو!
طيب مالك مالك مالك ، هسا ببعتلو مالك !
هبه : لا مش رح تبعتلو ، لانو مجدي بنت ، وانا عارفه ، بس وحياة جدولتي هاي ، الا اعرف مين هي!
عصام : بنت؟ مجدي بنت؟ هيك يا هبه؟ بتفكريني ممكن اخونك؟ له يا هبه له ! ولك اااخ بس ، بتشكي فيي يا هبه!
اه مجدي الحلاق بقولك اشتقتلك؟ والله لو انو ببوسك مش بحلقلك ، ما بقولك اشتقتلك ! ولك اذا انا مرتك ما اشتقتلك ، حلاق بدو يشتقلك!
اعطيني موبايلك اشوف ، اخدت هبه الموبايل من ايدو ، واللي من ايدو الله يزيدو!
عصام انصدم ،
مسكت الموبايل ، اول ممسكتو ، اجا مسج من مجدي بنص وجهها ، مكتوب فيه : عفكره شفت صورتك عالفيسبوك مع مرتك ، عفكره بتخزي وعيونها صغار ومكياجها شاطط!
هووووون طاب الموت ، هون المشكله صارت شخصيه ، مع هبه ومجدي ابن المخفيه!
#هبه_وعصام
#عمر_زوربا
............................
انا عيوني صغار و مكياجي شاطط ع كتافي!!
انا هيك يا عصام؟! مين هاي يا عصام مين؟! مشان الله مين؟! مين هاي اللي بتخليها تحكي عليي هيك ، ولك كيف هان عليك ، ولك وين الوعود؟ وين الضحكة والورود؟!
هبه رمت الموبايل ، ودخلت ع غرفتها ، ووقفت عالتخت ، مشان تطوق فوق الخزانه ، نطت نطة عالتخت ، ومن ميلة البخت ، ما قدرت تمسك الشنته ، نطت كمان نطة ، وقعت الشنته ع راسها ، ووقعت هي والشنته عالارض ، صارت هي تحت والشنته فوقها ، وقفت ، هي ويلها اللي صار ، ولا ويلها هالشنته اللي كلها غبره ، حطت الشنته عالتخت، وصارت تدور ع السحاب ، ولك وينك يلعن ابوك ع ابو حظي انا ، تجوزيه منيح ، شكلو عاقل هالحبيب ، ومن القلب قرَّيب ،بس انا هبه احساسي ما بخيب ، اصلا من عيونو مبين خاين ، اصلا ابصر امبارح بالليل وين كاين!
صارت تعبي اواعيها بالشنته بدون ترتيب ، وهي بتعبي رنت ع اخوها حمزه ، حمزه تعال في الحال ، خدني من عند هالخاين الكذاب المحتال ، قبل م اشنق حالي بالشال !
وهي بتحكي تلفون ، وقفت قبال المراي ، وصارت تتفرج ع عيونها ، وتفتحهم اكثر ، انا عيوني صغار يا ام شعر مزيت؟ وصارت تمد بعيونها قبال المراي ! هدول صغار هدول؟ ماشي يا مجدي يا حلاق ، والله لاصيدك يا حرباية ، يا خطافة الزلام ، يا لطاشة الذُبان ، يا حرامية الدُكان!
اجا عصام عند باب الغرفه ، يا بنت الحلال مالك ، ليش تغير حالك ، طولي بالك ،
عصام حل عني لانحر حالي هسا ، طب احكيلي، كان حكتيلي انك بتحب ، ولك كان حكيت ، ولك تركت مهندسين واطباء ومحامين مشانك ، ولك تيم حسن عملي نكز عالفيسبوك و تركتو مشانك ، بس في مثل بقول ، اذا جوزك خانك ، اعتبريه دخانك!
عصام شو بقول ، هبه ، اذا بتطلعي من البيت ما ترجعي !
هبه : لا بالله عليك؟ لا والله انا خفت هيك ، هيني برجف تفرج ، وحطت ايدها قدام وجهو وصارت تهز فيها ، لا والله خوفتني ، حسستني انو بيتك ستار اكاديمي ، منا اصلا بدي اطلع مشان ما ارجع !
خلي ست الحُسن ، مجدي الحلاق تبعك ، اللي بتقول عني عيوني صغار ، ولك انا عيوني صغار؟ ولك جاوبني جاوبني انا عيوني صغار؟! ولك تجلطنيش احكيلي بس احكيلي!
عصام ، صراحة عيونك عالتصوير ببينو قد النقطه ، بفكروكي مغمضة مرات ، بس انتي حلوه ما شالله عنك ، وانا بحبك وما في حدا ببعدني عنك!
رن موبايلها ، ردت !
حمزة : انا تحت !
حكتلو هيني جاي حمزة ، وحملت الشنته ، ابعد من وجهي عصام ابعد مش طايقتك ، دفشتو بالشنته ، تكعبل عالارض زي السلحفاه ، وطلعت!
بس طلعت ، وهو عالارض ، مسك موبايلو ، الا هي سوسن بترن عليه واتساب ، لسا ما لحق يقولها اه سوسن!
رجعت هبه بسرعه توخد الشاحن ناسيتو ، سمعتو وهو بقول سوسن ، ولك طب اصبر شوي ، ولك اصبر لاطلع ، ولك خف عحالك ، عصام معك ٣ ساعات ، اذا ما بتبعتلي ورقة طلاقي ع دار اهلي ، وحياة عيون امي خديجة ، الا امرمطك بالمحاكم يا مفتري يا ظالم!
نزلت عالشارع ، حمزه صافف ، فتحت الباب ورمت الشنته ورى ، وقعدت قدام ، حمزة بقولها : وين اخدك؟!
هبه : عالسينما بالله ، او عالمول جاي عبالي اتسوق ، او اقولك شو رأيك توخدني ع ديسكو ، ولك حمار انتا حمار؟ ولك وديني ع بيتنا ، ولك انتا كمان بدك تجلطني!
حمزه ولك مالك بحاول الطف الجو!
طب امشي امشي لابلعك الستيرينچ هسا!
ما فيكو حدا كويس ، كلكو كذابين وكلاب!
دخلت عالبيت هبه!
امها وابوها واختها ريم قاعدين بوكلو ، ابوها ماسك حبة فليفلة حلوه وبوكل منها ، شافو هالشوفه ، اجتهم الخوفه! وصفنو هديك الصفنه 😳
#هبه_وعصام
#عمر_زوربا
.........................
دخلت هبه ، ودخل وراها حمزه ، صفنو اهلها فيها هديك الصفنه ، الطاوله عليها بامية و رز ، الكل قاعدين بوكلو !
تفرجو عليها ، وريم اختها القويه بتقول : شوو حردانه؟!
حمزة من ورى هبه قاعد بأشرلهم ، هُس هُس معصبه!
بدي احكيلكم سطرين عن ريم اختها!
قوية ، قوية ، قوية ، مسيطرة ، فتاكة ، شبّاكة ، بتدرس بالجامعة ، ومحمله اهلها جميلة ، وكانت من اكثر الناس الرافضين عصام انو يتجوز هبه ، ليش ، لأنو قال عينو بيضا ، شو يعني عينو بيضه؟ نظراتو عالنسوان غريبه و مش طبيعيه ومن تحت لتحت!
اجت هبه ، ما حكت ولا كلمة ، قعدت عالطاوله ، اخدت معلقه ، وصارت توكل رز ، وهي تبكي ، وتحكي حكي مش مفهوم ابدا ابدا ، امها ، طب يما خدي نفس ، ارتاحي اول بعدين بتوكلي ، الاكل مش رح يطير ، بعدين كيف زابطه معك تبكي وتوكلي!
صفنت فيها هبه ، ورمت المعلقه عالطاوله ، طارت منها حبة رز ، اجت حبة الرز ع حواجب ريم ، ونسيت احكيلكم انو ريم عايشه عشان شغلتين ، اول شغله عشان لازم تعيش ، الشغله الثانيه عشان حواجبها!
لزقت حبة الرز عالحاجب الايمن ل ريم ، ريم تجمدت وفتحت عيونها ، حمزة ضحك شوي وحبس الضحكة ، لانو عارف اذا ريم عصبت شو بتعمل ، لانهم حلفو يمين حمزة وهو بالعاشر كاينه ريم عاضيتو من ذانو ، من الوجع صار نظرو خفيف!
هبه رمت المعلقه وقامت ع غرفتها هي وريم ، حلو عني اتركوني بحالي بطلت اكل اصلا جوعانه الله يلعن ابو الزلام تفو بس ، بكرهكم ! وخبطت الباب خبط ، هزت المزهريه اللي فوق التلفزيون!
ريم بس استوعبت الصدمة ، شالت الرزة عن حاجبه!
وبلشت تردح ردح متواصل بدون توقف!
ولك مشان هالاجرب النسونجي الكذاب الزعلطي الحقير الصرماية ابو قمصان الكروهات البصباص ابو عين زايغه الهامل ابن الستة وستين شرشوح ، بترمي الرز عليي يا هبله يا مغفله يلي بنضحك عليكي يا حردانه يا حربايه ؟!
روحي تشاطري عليه يا هبله ، ولك يا هبله ، ولك منتي هبله!
ابو هبه : خلصتي يابا يا ريم حكي؟! مش محترميتني!
ريم : يابا لو سمحت ، حواجبي خط احمر !
ام حمزه بتسأل حمزه : مالها اختك؟!
حمزه : اختك لحالك 😂
المهم المعلقه بس انرمت اجت بكتف حمزه ، الله ستر عينو!
ام حمزة ل ريم : قومي شوفي اختك مالها!
طيب بس اجلي ،
ام حمزة : لا شوفي مالها انا بجلي!
ريم اه اذا هيك بقوم بشوف الشعب كلو مالو اذا بدك!
ريم بتدق الباب ع هبه الباب مسكر!
هبه ، هبه ، هبه
هبه ما بترد !
ريم بتحكي لامها : يما هبه ماتت!
هبه من جوى : بعيد الشر عني إن شاء الله انتي يا ام رموش عيرة!
ريم : طب افتحي افتحي ، الا اذا مش شايفه من عيونك الصغار 😂
هون ريم تقريبا ضربت عالعصب الخامس عند هبه ، العصب المسؤول عن توزيع العصبيه ع اجزاء واطراف الجسم المتعدد اللحظات الاسترائية اللي بالعاده بسبب حروب و نزاعات و ربيع عربي!
قامت هبه ، فتحت الباب ، ومسكت ريم من شعرها ، ودخلتها لجوى ، وسكرت الباب ، ونامت عالتخت وصارت تبكي!
ريم عادي عندها وقفت عالمراي تزبط شعرها بكل برودة اعصاب ، ولك شو صاير؟
هبه بتسأل ريم وهي بتبكي وبتشهق شهق ، ريم ، بحياة ، الله ، ريم ، شوفي ، وبتأشر ع عيونها !
ريم : مال عيونك؟
هبه : انتي ، بس ، احكيلي ، انا ، عيوني ، صغار؟!
ريم : ولك اه منا حكتلك عيونك صغار ، وكل العيله بتعرف هالحكي ، ولك يوم عرسك ، ترجيت الكوافيره تسحبلك عيونك بالكحله بلكي بينو كبار ، بس قالتلي ما بزبطو 😂
هبه تقريبا حاليا صار معها سكري بكريات الدم!
بدها تصرخ!
الا هو موبايلها برن ، عصام ، كاتبه اسمو ( سندي بالحياة ❤️ )
فتحت الخط بدها تبهدلو ، لقتو مشغللها اغنية :
م بلاش نتكلم بالماضي ، ده الماضي ده كان كلو جراح!
وما دمت ب حبك انا راضي ، حندور ليه على شيئ راح!
قال وفتحت سبيكر ، مشان ريم تسمع!
ريم : يا اللله مااا ازنخوووو جوزك ، يا الله شو لبط ، خليه يضحك عليكي ب اغنيه يا هبله!
هبه : فشرت عينو بس عجبتني الاغنيه!
ريم : لانك هبله ، الاغنيه بتقول و ما دمت ب حبك انا راضي!!! يعني قصدو محملك جميله وراضي فيكي ع خرابك! يعني بشبهك ب هونداي افانتي ٩٦ ثنين جيد!
هبه : فشرت عينو منيح اني رضيت فيه اصلا !
ريم : ولك ليش لو ما رضيتي فيه مين كان اخدك؟! كريستيانو رونالدو؟!
#هبه_وعصام
#عمر_زوربا
......................
عصام قاعد بالبيت لحالو ، البيت قاعد قايم والمجلى عايم ، وبرن ع هبه ما بترد ! انتو بتفكرو بدو ياها ترجع ل سواد عيونها؟ او لحجمهم؟ لا طبعا ، هو جاع وبدو يوكل ، بدو يقضيها وجبات شاورما!
هو خبيث ، هيو مقضيها واتساب مع سوسن ، وعلى ذكريات و اغاني ومش فارقه معو ، شو قال ل سوسن ، انو بعتها ع دار اهلها لانو زهق ، غير هيك ، قال بدو يجيب صحابو يسهرو عندو وبدوش وجع راس !
ريم قاعده بتأرجل ، وماسكة كتابها وفاتحيتو ، وحاطه الموبايل بنص الكتاب ، نظرة مجاملة عالكتب ، و١٨ نظرة عالموبايل وتفقيد سنابشات !
هبه قاعده قبالها وحاطه بحضنها صنية فيها بامية بتقمّع فيها ، وبتقول : انا خلصت من الشغل ببيتي جاي اتعذب هون ، انا المفروض اتستّت ، اتدلل ، اتشخلع ببيت اهلي!
ريم بتسحب سحبة ارجيله ، وبتقولها والله لولا عندي دراسة ، بقمع الباميات ، وبقمعك انتي معهم ، وبقمع رموش ابوكي اذا بدك ، مشان هيك ترميش حكي ، والتهي بجوزك عصام اللي ٢٤ ساعة اونلاين عالواتساب ، وعلى تغيير صور 😈
هبه : عصام دايما اونلاين؟!
ريم ولك اه كل م افوت عليه بلاقيه اونلاين ، والله لو ببيع دوالي و كبة اونلاين مهو هيك ! بس شكلو الحب القديم 😈
اخرسي ، عصام بحبني بس انا زودتها عليه!
ريم : ممكن تحكيلي انتي لمتى بدك تضلي هبله؟ اعطيني موعد بس مشان اعرف ، لانو صراحة هبلك صار مبالغ فيه ، ارنلك ع صاحبيتي ايمان تقولك كم مرة جوزك بعتلها مسجات ونكز عالفيسبوك؟ اسألها كم مره بعتلها عيونك فيهم حزن؟ ولك مش مخلي جروب شباب وبنات الى بدخل عليه ، وبنزل صورتو بالشباح وبكتب مساء الحلوين بعد اذن الادمن!
هبه : هاي قصص قديمه قبل منتجوز عفكره ، كل الشباب بمرو بالمرحلة هاي ، بس عصام هسا عاقل ، بس هاي سوسن شكلها جننتو!
ريم رمت بربيش الارجيله : ولك بدك تجلطيني انتي؟ ولك منتي مسكتيه وهي بتحيكلو عنك ، هاد دليل ع انو فاتحلها مجال جوي واسع النطاق ، ولك هبل اللي يهبلك !
بهاي اللحظه ، بيرن جرس البيت ، بتنقز هبه ، وبتحمل صنية الباميه عالسريع عالمطبخ !
حمزه لابس شباح وشورت ، فتح الباب ، الا هو عصام ، حامل وردة حمره ام الليره وجاي!
عصام : هبه هون؟!
حمزه : بالله عليك؟ لا والله هبه ب تونس! طبعا هون ولا وين بدها تروح! مش ضايل الا تقولي عندكم حمام؟ واقولك لا والله بنعملها عالسطح !
فوت حبيبي فوت!
عصام قح وهو فايت ،
حمزه : شو رأيك تقول يا الله يا الله؟! يا زلمه هو انتا داخل ع بيت فريال ، سيبك من اجواء باب الحاره!
حمزة دق الباب ع ريم وهبه ،
حمزة : جوزك النظوة اجا ، عليم الله حاطت عطر ، ما بحطو لذبانه ميته ، عطر وضرر هاد مش عطر!
هبه : فشرت هاد انا جبتلو اياه من سامح مول!
ريم : شكلك داخله ع قسم المنظفات بالغلط وجايبيتو؟ مهو مش منك ، من عيونك الوساع!
هبه : اه علي صوتك كمان وذكريه بعيوني اه اه!
ريم : لا شو اذكرو ، مهو كل يوم بتصبح بعيونك ، يا حبيبي لما يكونو منفخات ، بتكوني زي الممثل الصيني شو اسمو؟!
حمزه : جاكي شان 😂
هبه : اخرسو يا كلاب ، ولكو فضحتوني ! بعدو قاعد لحالو؟
حمزه : لا هي امي قعدت معو وبلشت تحكيلو انك معززة مكرمه عنا ومن هالحكي اللي دمر نص بنات الاردن!
ريم : اسمعي زي متفقنا ، اوعي تطلعيلو ، اذا بتطلعيلو بطعنك ، انا رح اطلعلو ، وانا بعرف شو احكيلو ، بدي اسمعو كم كلمة زي ريحة عطرو الديتول ، واخليه يروح ، والمره الجاي بتطلعيلو ، بس هسا اثقلي! اتفقنا؟!
هبه : اتفقنا ، الله يوفقك ويجوزك يختي لانك بتوقفي معي 😍
ريم : ريم راحت حضنت هبه ، تخافيش يختي انتي اختي حبيبتي ،
ريم وهي عابطيتها بتقول بعقلها : انا بدي ياكي تضلي مشان امك بدها تعزل البيت ، ولا لو علي هسا بخليه يوخدك 😈
ريم : اوعي تطلعي!
هبه : ماشي 😘
يتبع
#هبه_وعصام
#عمر_زوربا
يتبع😈😂❤️
Bạn đang đọc truyện trên: AzTruyen.Top